Otsailaren 14 eta 17an, 3.eko ikasleei lehen brebeta xuria antolatua izan zaie.

Ostiralez, hiru geletan banaturik eta denbora herena zutenek beste gela batean, goiz osoa frantsesari lotua zen : testuaren galderak, ber idazketa, diktaketa eta idazlana.

Eguerdiko bazkaria eta pausaren ondotik, mat froga pasa dute bi orduz.

Asteburua izanik azken berrikuspenendako, astelehen goizean brebeta xuriaren bigarren partea pasa dute goizez : bi orduz historia, geografia eta herritar heziketa froga eta azken orduan, zientziak.

Arratsaldean, betiko kurtsoekin segitu dute. 

Bihartik landa, hirugarreneko ikasleek enpresako ikastaldia egingo dute ostirala arte.

Otsailaren 8an, larunbatez, kolegioko 4. eta 3.eko ikasleak Gourettera joan dira, Olagarroa kirol elkarteari esker !

Elurra urritzen ari bada ere, gozatzeko beste bazen !

Lau eta hirugarreneko 45 ikasle izan dira eskiatzera aurten.

Maila guzietako ikasleei idekirik, motibazio handiarekin abiatu dira goizeko 6:00etan kolegiotik !

Bazterrak hain xurituak ez baziren ere, umore onean lagun artean egun eder bat pasatzeko gogoz joanak zirenez, haien doia topatu dute bertan.

Ziztuan lerratzearen sentsasio goxoak eta zirrarak ekarri dituzte etxera, ondokoan elurraren xamurra gozatzen ahalko dutenen esperantzan !

Zorionak ikasle parte hartzaile guziei eta esker beroenak ere bai etorri diren laguntzaile guztiei !

Otsailaren 4an, asteartez, Gourmelon andereak, Hegobus garraio elkargoko arduradunak hitza hartu du ordu batez 6A eta 6Bkoei lehen txandan eta ondotik 6D eta 6Ekoei. Kolegioko IDZtan elkarturik, otobus prebentzioari buruzko helburuak oroitarazi ditu : informatu, alerta eman eta gogoetarazi.

Lehenik, Hegobusek 2900 ikasle inskribatuak elkartzen dituela, 120 zerbitzu eskolarrak kudeatuz, 36 ibilgailu egunero ezarriz : 27 autokarrak, 6 autobus eta 3 minibus. Eskolako garraio izen desberdinak zerrendatu ditu : Le Basque Bondissant, Hegobus, Réunir, ATCRB, Transdev, Citram Pyrénées.... Ondotik, autokarra eta autobusaren arteko desberdintasuna azaldu die, autobus batek 150 000€ eta 200 000€ arteko prezioa izanki.

Bigarren parte batean, otobusa etorri aitzin, otobusean direlarik eta kolegiora iristean nola portatu behar diren adierazi die (ikaslearen portaera, materialaren errespetua, uhalaren inportantzia eta bereziki 135€ko ixuna ez bada ezarria, ..) eta kartaren garrantzia eman die. Quizz-bilana batean parte hartu dute saioa borobiltzeko.

Gero, talde guztia kanpoko eremura joan da husketaren ariketa baten egiteko, aholkurik gabe lehenik eta aholkuekin ondotik. Oro har, ikasleek gainditu dute ariketa hori !

Bukatzeko, ikasle guztiak itzuli dira IDZra, azken aholkuak entzuteko, emaztea eskertzeko eta eskainia izan zaizkien esku argia eta euskarazko liburuxka eskuratzeko.

Milesker hegobus Euskal Hirigune garraio sareari azalpen guzti horiendako !

Agian, ikasle bakoitzak kondutan hartuko dituela eta bere burua babesten, otobusa errespetatzen eta gidaria agurtzen segituko duela !

Azaroan hasi eta urtarrila arte Olagarroa kirol elkartearen pala txapelketa luze bat izan dugu aire hartzeetan ! Luzea, parte hartzaile kopurua handia baitzen.... 16 bikote 4. / 3.eko mailan eta 34 bikote 6. / 5.eko mailan.

Azpimarratzekoa da 6. eta 5.etan neskek erakutsi duten motibazioa, bai kantxan eta baita lagunak sustengatzen ere !

Eskertzekoa da ikustea zenbat ikasle prest den palan aritzeaz gain bertze lanetan parte hartzeko : juja, txapazaina, marrazaina... finalean komentarista bikainak izan ditugu, lehia biziari hitzak ematen, dena umore eta giro onean (Xabier Eguzkitze eta Abel Barriola kezkatzen hasiak dira tokia galduko ote duten).

Finalen egitaraua : 

6. / 5.eko mailan : Xan Carricaburu - Txema Gogorza 15 / Gabi Harocarene - Unai Tellechea Muruaga 12

4. / 3.eko mailan : Ximun Daguerre - Joanes Iratzoki 15 / Eñaut Zozaya - Iban Larzabal 14

Komentarioak : Hodei Querendez, Unax Oxandabarratz, Unai Mihura...

Jujeak : Eñaut Barrendeguy, Iñaki Endarra

Biba zuek ! Txalo bero bat parte hartzaile guziei eta goresmenak txapeldunei !

Urtarrilaren 21eko gauean, inguruan ditugun lehen mailetako buraso berriak elkartu dira kolegioan.

Irailan 6.eko burasoak izango direnei harrera hitza eman die Edurne Manterola Zuzendariak, heldu den sartzean Iñaki Lecuona izango zela azpimarratuz.

Lehenik ikasle batendako eguna erakusten duen filma alaitua aurkeztua izan zaie.

Ondotik, burasoen galderei erantzun dute bertan ziren Edurne eta Iñaki, Argi Hezkuntz Aholkularia, Maritxu animatzailea eta Mathilde, Armelle irakasleak. Betiko kezkak agertu dira : nola eginak diren ikasgelak, otobusen antolaketa eta izen emaitea, zurkaizgoa... etc..

Mintzaldi guztia euskaraz eramana izan da, kaskoetan egindako Mathilden bat-bateko itzulpenari esker.

Gaualdi biziki sanoa eta atsegina izan da. Lasaituagoak eta kolegioari buruzko liburuxka batekin joan dira burasoak.

Urtarrilaren 21ean, astearte goizez, kolegioko 6. guztiak Baionako antzokira joan dira, Celine Shaefferek zuzendutako "La république des abeilles" ikusgarria ikustera !

Bertan, antzokiak arnasa hartzen du "erlategi baten  ispirituan". Ipuin dokumentala hori antzeztua, dantzatua, magikoa eta misteriotsua da. Ikusleen sentimenduekin jolastuz, kofoinaren bizia aurkeztua da erlekumeetatik kolonia berriaren fundatzera, sasoinen zikloak berriz biziaraziz eta haien artean dituzten loturak berpiztuz.

Emanaldiaren bukaeran, gure gazteek aktoreekin solastatzeko parada ukan dute, gelan prestatutako galderak pausatuz.

Emanaldi izigarri polita eta aberatsa, frantsesezko kurtsoetan lantzen segituko duten,a arlo desberdinetako txosten bat sortuz : apaindurak, janzkera, aktoreen jokamoldea, argiak, hedatu den usaina eta haien iritzi pertsonala.

Erran bezala, urtarrilaren 19an, igandez, kolegioko 18 bikote gazteak elkartu dira Ziburuko pilota plazan instalatutako karparen azpian, publiko eder baten aitzinean dantzatzeko !

Jende ainitz etorri da, bai publikoa baita ere dantzariak !!

Bi kategoriak antolatuak ziren besta komitearengandik : 12 urtepekoak eta 13 urtetik landakoak !

Bikote bakoitza behin edo bi aldiz pasa da eta bukaeran emaitzak emanak izan dira :

Lehen kategorian : 

1. saria : Lili Abadie eta Amaiur Fagoaga (5.ak)

3. saria : Ana Pujos eta Ainara Duhau (5.ak)

Epaimahaiaren sari berezia : Liloia Behoteguy eta Milia Muruaga

Bigarren kategorian : 

2. saria : Ainhoa Biscay eta Maddi Arrizabalaga (4.ak)

Biharramunean, kolegioak dantzari guztiak eskertu ditu krakada eder baten inguruan !

Txalo bero bat 36 ikasle parte hartzaileei eta bereziki aste batez ikasi dutenei !!!

Urtarrilaren 14an, astearte goizean, Senpereko Larreko antzokira joan dira 4Dko ikasleak.

Libertivore konpainiak bi dantza ikusgarri aurkeztu dizkie : bakarkakoa (Hêtre) eta binakakoa (Phasmes). Gizakitik urrundu eta naturatik hurbiltzeko aukera, dantzarien gorputza makurtzera eta tolestera daramaten bi ikusgarri.

Hetre : emazte bat emeki-emeki errealitatetik urruntzen da eta misteriozko, ametsezko oihan batean sartzen da. Haren liana-gorputza hurbiltzen da, oihanean barna sartzen da haren baitan desagertu arte.

Phasmes : animaliatik, mineraletik zein begetaletik hurbilduz, forma bitxi eta isila gure aitzinean gauzatzen da. Dantzak eta gorputzen akrobaziak argi jokoekin bat egiten dute, fasmidoa bezalako irudi abstraktuak sorrarazteko.

Emanaldiaren ondotik, beste eskoletako ikasleak bezala, artistekin topaketa egiteko aukera ukan dute, haien galderak pausatuz.

Ikuskizunaren bukaeran, kolegiora itzuli dira eta laster dantza tailerra abiatuko dute Myriam Perez dantzariarekin, kolegioan bertan !

Joan den astetik, ikasleak elkartzen dira goiz edota eguerdiko jolas garaietan fandangoan trebatzeko !

Aurten 18 ekipa motibatu dira heldu den igandeko fandango konkurtsoan parte hartzeko eta haien artean, 8 ekipa aste batez ikasi dute !

Saio horietan, 4 urratsak berrikusi edota ikasi dituzte, transizioak, postura, besoen altxatzea, teknika sakondu dute azkarki bikoteka !

Giro onean eta motibaturik agertu dira kolegiokoak !

Txalo bero bat haiei eta xantza on ! 

Hitzordua : urtarrilaren 19an, igandez, Ziburuko pilota plazan, arratsaldeko 5:30tan !!

Urtarrilaren 13an, astelehen goizez, kolegioko 4. eta 3.eko ikasleak gure ikastetxearen ondoan den Itsas Lizeoara joan dira bisita bat egitea.

Han bertan, hiru taldetan banatu dituzte. Lehenik, laugarren mailakoak eta ondoko orduan hirugarrenekoak.

Ikastetxean diren gela esanguratsuenak ikusi dituzte. Hala nola, hotzaren gela, mekanika lantzen den tailerra (sudaketa gelatxoekin, egiazko motore batekin...) ;  korapilo ezberdinak ikasten den gela, karta eta kalkuluak egiten diren ikasgela berezia, sekuritatea lantzen den gunea eta itsasontzi handi baten kontrola gela batean ikasleak trebatzeko prestatua. Eta nola ez, agian gehien gustatu zaien gela : nabigazio simulatzailea. Talde batzuk barnategia eta jan gelara ere joateko parada izan dute.

Orohar, ikasleei gustatu zaien bisita izan da eta harrituak izan dira nola ongi apailatua den alboan dagoen ikastetxea hau.

Milesker Itsas lizeoari haien harrera eta aurkezpenarendako !