Piarres Larzabal Kolegioa

 

SACoche - Sésamath

EasyScol

Seaska

Ikastolen Elkartea


 

Maiatzaren 13an, asteazkenez, 6., 5. eta 4.eko ikasleak etxean zirelarik, gure kolegioko 3.eko ikasleek azterketa goiza zuten...

Alde batetik, brebetarako ahozko ofiziala pasa dute banan banan, epaimahai baten aitzinean, obra bat, artista bat, ikastaroaren bilana edo gai librea aurkezten hautatu zutelarik. Bost minutuko prestakuntza ukan eta, 5 minutuz zuten haien lana presentatzeko eta beste 10 minuta batzuk epaimahainatik egindako galderei erantzuteko. Froga honek 100 puntu balio du brebeta ofizialarendako.

Bestalde, ekainan pasako duten brebeta kari, euskara frogaren ahozko xuria trebatzeko aukera emana izan zaie binaka, brebetako baldintzetan.

Goiza osoa ongi iragan da, orain asteburu luzea honetan pausatzeko parada dute....

Maiatzaren 7an, ostegunez, bazkaltzeko pausan, Urruñako Amaia Carrere ilustratzailea gonbidatu zuten Antxeta irakurzale klubaren kideek !

Mintzaldi denboran, bere ibilaldia, bizipenak eta esperientziak kondatu dizkigu...

Hasi baino lehen, margo bat eskuan hartuz solasaldi denbora guztian margotzen aritu izan da !

Ttipitatik lapinak marrazten zituelako, marrazketa gustukoa zuela ohartu zen. Eskola ondotik, duela lau urte, horrela hasi zen, marrazten eta marrazten... Lanik ez, proiekturik ez... Lagunen eskaerak zituela eta, haurrendako marrazkiak egiten hasi zen akuarelari esker. Ondotik, kontratu desberdinak lortu ditu adibidez ihauterietako pertsonaiak marraztuz.

Betidanik komikigintza maite izan du, baina ez zuen buruarengan sinesten, bere marrazkietaz bizitzen ahalko zenik ere ez zuen sinesten... Hala ere bere pasioa izanki, saiatu da beste lanik atzematen, baina deus ez zen bere gustukoa ; beraz marrazten segitu du. Nahiz eta ez diru ainitzik irabazten, beste lanik aurkitzen ez zuenez ahal den guztia egin du profesionala bilakatzeko.

Komikigintzan hasi delarik, beti marrazkitik abiatu da eta, gero, pertsonaien arteko solasak sortu, sekulan ez alderantziz.

Ozenki azpimarratu die : "Amets bat baldin baduzue, saiatu ! Egin !"

Komiki festibal batetara komitatua izan zen, bera ados zen, baina deusik ez aurkezteko ! Ondorioz, "Ilunabar" liburuxka 6 hilabetez sortzea lortu zuen ! Frantsesez eta, geroztik euskaraz ! Ingelesez ere nahiko luke !

Bestalde, ikasleek gustuko dituzten mangak berak er maite dituela erran du, baina gogorik ez haiek marrazteko.

Obra batzuetan egin dituen marrazkiak proiektatu ditu : "Binbadabum" (pailasoak), "Red Dragons", "Ttinka" (ttikiendako), "Pitxu" (maskarada)....

Eskatua izan zaio nondik lortzen duen inspirazioa : Naturan edo bakarrik delarik, jendeen artean izanki behatzen dituelarik (haien irriak eta....), musikarekin....

Bukatzeko izan den eztabaidan, ikasle batek azpimarratu dio biziki zaila zela pentsatzen genuena marraztea, zein truko ematen ahalko liokeen. Bere erantzuna zera izan da : iada saiatu behar erregularki marrazkiak kopiatzen, gorputzak edota aurpegiak, eskuak, posturak, eta egin eta eginez, pittaka lortzen dela trukoak izaten...

Azkenik, eskertzeko oparitxo bat eskaini ondotik, ikasle batzuk joan dira bere autografoaren bilat hurbildu zaizkio.

Txalo bero bat parte hartu duten eta adi egon diren ikasleei ! Eta noski mila esker zuri Amaia kolegiora etortzeagatik eta zure pasioa partekatzeagatik !

Maiatzaren 10ean iragan den Herri Urratsen, pegatinak saltzeko motibatu dira kolegioko 62 ikasle !!!! Bikain !

Goizeko 10:00 eta 14:00ak artean, pegatinak eta kutxak eskuetan jaso eta, lakuaren itzulia egin dute lagunen artean, haiek finkatutako kuadrila eta ordutegia errespetatuz, jendeari pegatinak proposatuz eta diru kutxak betetzen saiatuz.

Maila guztietako ikasleek parte hartu dute, giro onean, motibaturik eta lagunen artean elkartuz !

Batzuk ere lema bat asmatu zuten : "Pegatinak hartu ! Seaska lagundu !"

Txalo bero bat zinez ikasle guzti horiei eta Nicole, Itsaso eta Maritxu laguntzaileei !

Maiatzaren 6an, asteazken goizean, txirrina jo bezain orduko, kolegioko ikasle guztiek otobusa hartu dute, Donibane Lohizuneko Le Select zinemara joateko "Mugagabean" laburmetraiak deskubritzeko.

Bost film laburrez osatua den programa honek euskal zinemaren aberastasuna aztertzen du. 

Genero aniztasunaren bidez - animazio dokumentala, komedia eta drama tarteko - film horiek erronka unibertsalei aurre egiten dieten pertsonaia gazte edo ez hain gazteak azaleratzen dituzte : eritasuna, hizkuntzaren hesia, desberdintasun sozialak, familia tentsioak etabar...

Bakoitzak, bere erara, proba gainditzeko ausardia aurkitzen du, erresilientziaren eta ametsaren indarra agerian utziz.

Ikasleek beren burua ezagutzeko edo beste errealitate batzuk deskubritzeko aukera izanen duten egoerak, kontakizun sentikor eta inspiratzaileek eramanik.

Hona zein ziren bost laburmetraiak :

1- "Dortoka uhartea" - Maru Solores (2002) :

Espaziotik etorritako izaki bat lur gainera eortzen da bat-batean, zehazki dortoka baten itxura duen harri bihurtutako uharte baten inguruetara. Izaki hori Ainhoa da, asma kronikoa duen 9 urteko haurra, uhartean gau batez bizirauteko desafioari aurre egiten diona, uhartea lehen aldiz aurkitu duen estralurtarra dela imajinatuz. 

2- " Hubert Le blonen azken hegaldia" - Koldo Almandoz (2014) :

Motorraren aintzindari baten historia ; haurra zela burruntziekin amets egin zuen eta bere ametsa betetzen hil zen.

 

 

3- "Ximinoa" - Itziar Leemans (2024) :

Junek (16 urte) lehen udako lana lortu du: Constance (8 urte) zaintzea, maitasun falta handia duen neskato sentibera. Haurra laster lasaituko da, eta urte osoan zehar haren haurtzaina izateko itxaropenak ilusio handia pizten dio Juneri. Baina haurrarekin gero eta lotura estuagoa egin ahala, Junek klase harremanen bortizkeria eta bere izaeraren ukapena ezagutuko ditu. 

4- "Hitzak" - Josu Martinez (2022) :

1966. Ipar Euskal Herriko Bizkarsoroko herrixkan, lau gaztek hitz batzuk aurkitu dituzte mendian lurperatuta. Euskarazko hitz zaharrak. Herrian, gero eta gutiago
mintzatzen da hizkuntza hori. Gazteak frantsesez ari dira. Michellek 21 urte ditu, eta ez ditu ulertzen. Bere familian aspaldi ez da hizkuntza hori hitz egiten. 

5- "Amona Putz" - Telmo Esnal (2009) :

Batzuetan, haur txikiak dituzten senar-emazteek amona faltan botatzen dute, batzuetan bakarrik.

 

 

Zinema bukaeran, ikasle guztiak azken orduko kurtsoetara itzuli dira.

Milesker ainitz Donibaneko Le Select zinemako ekipari !

Maiatzaren 7an, ostegunez, goizeko jolas garaian kolegioko ikasleek mikroaren aitzinean ukan dute hitzordua !!

Herri Urrats besta kari hainbat galderei erantzun dute eta parte hartu baikorki.

Gainera erantzun onak emanak izan badira, aurtengo KDa irabazi dute baita ere bixkotxak tripa gozatzeko !

Igande honetan Herri Urrats : Maiatzaren 10ean, igandez dugu hitzordua, bertan kantatzeko, jolasteko, dantzatzeko, jan eta edateko eta noski Herri Urrats / Seaska laguntzeko !

Gure ikasleak pegatinak saltzen ere aurkituko dituzue !

Zuen gain kondatzen dugu !

Apirilaren 30ean, ostegun goizez, hirugarreneko ikasleek UEU eta Seaskak antolatutako Euskara brebeta idatzi ofiziala pasa dute.

Ikasleak lau geletan banatuak izan dira 3 orduz, azterketa baldintzetan haien idatzia egiteko.

Froga lau partetan osatu da : entzumenaren ulermena, idatziaren ulermena, jakitatea eta idatziaren ekoizpena.

Bigarren partea, ahozkoa izango da, ekainan, brebeta egunetan.

Dakizuenez, 3.eko ikasle talde batek Concours National de la Résistance et de la Déportation lehiaketan parte hartzen du aurten.

Lehiaketaren gaia Shoah-ren inguruan denez geroz, Donibane Lohizuneko familia judu baten historiari buruzko gai bat hautatu dute : Meyer familia.

Meyertarrei buruzko bideo dokumental ttipi bat ekoiztu dute ikasleek, lehiaketara igorri dutena eta lokarri honekin begira daitekeena, hemen klikatuz.

Apirilaren 28an, asteartez, EITBko kazetariak, Asier gure ikasle ohia barne, hurbildu ziren kolegiora, ikasle hauekin erreportaia baten egiteko !

Hona hemen klikatuz lotura ! 

Goresmenak ikasleei eta milesker EITB-ko kazetariei !!

Kolegioko zenbait ikaslek, orientazio bidea argitzeko asmoz, Donibane Lohitzuneko Ramiro Arrue Lizeoa bisitatu zuten apirilaren 24an.
Bertako formakuntzak ezagutzeko aukera izan zuten eta baita hainbat tresna erabiltzeko parada ere bai, hala nola, Logistika arloko ibilgailuak ; zinez interesgarri eta dibertigarria izan zen.
Datorren urterako erabaki egokia hartzeko lagungarri izatea espero dugu!

Apirilaren 21an, asteartez,  "Ma langue au chat" konpainiako hiru ingeles antzezlarien harrera egiteko plazerra ukan du Piarres Larzabal kolegioak.

Bosgarren, laugarren eta hirugarreneko ikasle guztiek eguneroko bizitzako gaiak osoki ingelesez landu dituzte aktoreek proposatutako tailerretan parte hartuz.

Murgiltze dibertigarria baina zorrotza, ikasleei bi ordu pasatuz ingelesez trukatzeko parada eman diena.

Aktoreek haien gogo eta indar biziari esker ikasleak guztiz haienganatzen jakin dute.

Iaz bezala aurten ere gure ikasleak liluratu dituen esperientzia aberasgarria izan da eta ziur, datorren urtean ere errepikatuko dena.

Thanks / milesker Georginari, Leshauni eta Leori !

Martxoaren 2tik apirilaren 1era eta urtero bezala, kolegioko familiei proposatua izan zaie Elikadura Bankuaren aldeko bilketan parte hartzea.

Aurten, higiene produktuak (linja garbitzekoa, gorputza garbitzekoa eta hortzetako pasta) eta janaria (kafea, azukrea, bixkotxak, janari kontserbak) bost astez bildu dira nahi eta ahal zutenen artean.

Apirilaren 2an, osteguneko eguerdiko pausan, Elikadura Bankuaren arduradunak kamioez etorri dira, bilketa kargatzeko eta hor ziren ikasleek lagundu dituzte. Emaitzak eskuratu ditugu : 184 kilo bilduak beraz 368 bazkari eskainiko dira inguruan eta beharretan diren familiei !

Milesker ainitz parte hartzaileei eta bilketa errextu dutenei !!